Një pensioniste 88-vjeçare nga Camporosso, në rajonin e Ligurias në Itali, ka ndërruar jetë, pasi ka parë shifrën e majme në faturën e saj të ujit, që duhet të paguante.
Një gabim nga ujësjellësi në llogaritjen e faturës së ujit të shtëpisë së saj, i shkaktoi të moshuarës një tronditje që e çoi drejt vdekjes, siç raportohet nga Corriere della Sera.

Sipas medias italiane, fatura që ka shkuar në shtëpinë e të moshuarës kapte vlerën 15 339 euro, ndërsa në të vërtetë ajo kishte harxhuar vetëm 55 euro ujë në muaj.

Një gabim, i cili duket se vjen si pasojë e një matjeje të gabuar, e cila, megjithatë, për shkak të pagesës automatike, ka zbrazur llogarinë bankare të të moshuarës. Kur u konstatua se konsumi maksimal i 88-vjeçares ishte vetëm disa metër kub ujë, ishte tepër vonë për të.

Ndërkohë, kompania e ujësjellësit e ka pranuar gabimin dhe ka deklaruar se shuma e parave i është kthyer familjes të së moshuarës fatkeqe, ndërsa këta të fundit kërkojnë zbardhjen e ngjarjes si dhe faturimin e përgjegjësisë te ta.